ö ä ü
Heute is freitag und i hob a neiche blog-technik-idee. I schreib jeden tog wos passiert und speicherts und nach a boa tag kani dann ois veröffentlichen. Ma i bin so genial!
Heute is freitag des merkt ma alla scho daran dass auf Facebook olle vom saufen reden. Englisch is voi doof. des gfreit mi goa ned nullo. In Electronic Music spinnt es programm deswegen klingen ob jez einfach alle instrumente wie a geige. Super!
Weil i da fiona mein iPod borgt hob und somit a in Study Hall ohne akustische Beschallung woa, wos mi vollends aus da bahn gworfn hod, weil i alle 10 minuten iwos doa woit mim iPod z.b. aufd uhr schaun, musik hean, internet schaun, doodle jump spün, jo deswegen hob in meim neuen collegeblock a liste angfangt in der i olle menschen aufgschrieben hob die i kenn. Bis jez hobi 217. Des is oba ned so leicht zum sogn wen ma "kennt".oba i gib ned auf!
I hob nu an flauschball in Photography gmocht. jez mochi nix mehr.
Heute Samstag scheint die Sonne, und i räum mei zimmer auf. des woa nämlich a scho dringend nötig. es gwand is jez im kastl da bodn is frei und sauggestaubt. Do foit mir auch sofort auf dass des eigentlich goa ned so kla is. die schranktür hobi a "repariert", einfoch a boa moi drauftretn dann passt des scho und immerin gehts jez bessa ois vorher. beim rollo funktioniert des ned so leida, weil zrissene schnürdln kamm ned wieder zamtretetn. Die Staubbelastung is jez a nicht unbeachtlich verringert.
wos i nu gmocht hob is schöne kleine sachen, fotos und pickerl in ein buchi reinbicken, damits schön ausschaut. I was jo warum i kino-, football- und theaterkarten aufheb. Die hobi do jez fesch einibickt.
Heute hobi endlich es medizinische ohrringerl aussadoa deafn und hob da mama iare einidoa. do is ma glei da verschluss obigfoin und i bin 5 minuten am bodn glegn und hobs ned gfundn dann hobi von oben durchn schreibtisch obigschaut und gseng dasser ganz blöd auf am buach glandt is wos ma von unten fost ned siagt. jez is wieda do und ois is in ordnung.
Meine glühbirnen hobi a gwechselt weil nämlich 3 von 4 nimma gangen san und i überhaupt nix gseng hob. ane is glei entgegengebröselt 2 samma in da fassung stecken bliem, do hobi dann deppad herumgwerkelt bis endlich passt hod. Jez hobi tageslicht im zimmer. hell wie nie. jez brauchi mi a nimma schämen wos do so "ans Licht" kumt. (ha ha ha wortwitz)
Fein Sonntag hobi wenigstens an plan ghobt, nämlich hod mi da die Amy Montgomery obghoid, di is von AFS und duat gastfamilien finden. Die woa in österreich ois austauschschülerin und hod a scho moi a Wienerin do ghobt und redt a deutsch. Jo und in da Bibliothek woa so a international dings und i bin do so gwesen bei ihrm AFS stand und hob mei EIGENES schild ghobt wo elena girll draufsteht und i hob es kochbuch, mei salzkammergutbuch, prospekte und die panorama-weihnachtskarte von da oma mitghobt. Die karte hod die kinder besonders gfoin die woan ganz entzückt.
Do samma hoid 2 stund gsessn, hom moi herumgschaut, informiert undso. Dann samma zu ihr gfoan und hom GEJAUSNET!!! die hod drei kinder. Zwillinge: Charlie und Maggie, 9 und in Joseph, 7.
Die san olle total gscheid und spün klavier. Und die san wirklich guad. denen hobi beim klavierspün zuagschaut dann homma barbie gspüt. und es haus homs ma zagt und jo des heat si jez iwie total wenig an oba wir hom jo ois über längeren zeitraum gmocht. Valentinstagsschachteln homs a gmocht, genau.
Dann bini hamgfiat word und jez moch i nix mehr.
Am Dienstag is ma ned guad gangen, do hobi mi nochm Lunch hinglegt und dann bini hamgfoan. dort hobi dann gschlofn. Und zwar ziemlich bis um 8 in da frua. Am mittwoch woas wieda bessa do hobi gfernset und bananenjoghurt gessn, bei wos ondas hätt i vermutlich gespeibst. Am abend is dann die CAITLYN mim andi kuma und die woan dann so do und so. *frohi* Do homma top gear gschaut des woa so lustig, weil top gear is einfoch supa!
Um 10 bini schlofn gangen eingschlofn bini wieda total bald, nämlich um hoib 12. I kann überhaupt nimma schlafen. :(
Am Donnerstag woa wieda alles gut. do bini wieda ind schui gangen, hob eh nix wichtiges verpasst. Nur in english interessierts mi goa ned, des deppade trum soi 4-5 seiten lang sein. des wird wieder moi a fetzngaude!
Daheim woan nu die Caitlyn, da david und da andy do, oba die san dann boid gfoan weils in sean von bloomington obghoit ham. des hast heit weni ham kum san ALLLLLLLLLE da! full house. und die sonne scheint a voi schön.
Heit (Freitog) homma aussadem Feueralarmprobe ghobt, wieda moi. do san a boa leida verbrennt weils die sonne und es licht ned gwohnt san (ned wengam feuer, woa jo goa kans). Mir hods 15% sehfähigkeit wegbrennt. ois war i nu ned kurzsichtig gnuag.
Des kumt hoid davon wemma in ganzn tag in an betonklotz eingsperrt is, und ausserdem (wos jo voi dumm is): Olle Lehrer miassn die Rollos herunten hom zum Energie sparen. Des hast es is ned nur schweinskalt im Winter, weils die Heizung auf höchstens 18° aufdrahn und finster is a imma. Wie gibts des dass wir unzivilisierten Bergbauern in österreich des schaffen dass ma wärmeschutzfenster mochn und die Amis ned. moi nachdenken, gell. :D
So weit so gut, in Chor hod uns die Mrs. Broge die höchste note vorgsungen dies kann, a hohes e. 3 oktaven und 3 töne kanns singen. I schaff 2 oktaven und 2 töne oda so. wobei i ned ganz sicha ob ma manche ois quietschen oder singen kategorisieren soi.
Zwischen Freitag dem 18. und heute hobi nix gschriem weil ma des zviel oabeit is wenns nur 5 leit lesn.
Am Samstag woama voi einkaufn, in da Mall. Und zwar bei Forever21 und Macy's und sowos hoid. und mir foit grod auf dass ma überhaupt ned noch schuhe gschaut hom. Wahnsinn. ajo und nachher woama nu bei Old Navy, do hobi am meistn kauft. Daham homs Roast Beef gmocht und weil ma zspät woan homs ois aufgessn. Für 7 leit hams kocht und zu viert homs ois allane aufgfressn. Solche schweine. :)
Am Montag woa President's Day = frei. I was nimma wos ma gmocht hom, nur dass frei woa.
Am Dienstag woa wieda schule und i hob glaubt dass es Persuasive Paper scho due is, woas oba ned, sondan bis freitag. Zum glück! Aussadem lesma in Englisch Huckleberry Finn. Eiso die andern, i ned. weil i scho gnuag stress hob mit meim persuasive paper und sowieso generell schul-lektüre boykottiere. (schreibt ma des so?)
Am mittwoch woa auch schule, und i hob an überraschungstest über MLA zeigs mochn miassn, weili jo letzte wochn ned do woa am mittwoch. True or False. I woa so guad vorbereitet dass i jede frage geraten hob. Des muas ma ollerdings dzu sogn dass die andan des MLA scho seit da 3. klass lernen. Und wir des goa ned hom. Wir werden sehn wie guad i im raten bin. Im schätzen bini jedenfois sauschlecht.
Am Donnerstag woa die Fiona ned do. Des woa natürlich tragisch.
Mein study guide in geschichte hobi fertig gmocht fürs quiz am freitag. \
Am abend hods zum schneien angfangt. Des hod mi nicht gefreut, weil wenns im februar moi a bissi frühlingshaft is, dann hobi scho gnuag vom winter und wü unbedingt frühling ham. Aussadem hobi mei persuasive paper weida gschriem. Oba fertig bini ned wordn, des woama dann oba wurscht, i hob mi einfoch mental drauf vorbereitet dass i im Mr. Kartholl sog dass i mehr zeit brauch weil des so schwer is.
Am Freitag um 6 hod die schui angruafn: 2 hour delay. I hob ma in wecker auf hoib 9 gstellt und hob weita gemützt. Um 8 bini dann aufgwocht und bin aufbliebn. 5 minuten später hod die schui wieda angruafn: Snow Day! Des woa total klass, weil des erstens wie verlängertes wochenende is, und des aussadem hast dass es PP erst am Montag due is. Zufall gibts ned ois gheat so wies is! Wieder moi bewiesen.
Am Sonntag hobi ma die Oscars angschaut, und da David hod die Peer edits fürs PP gmocht. Dann hobi ENDLICH ois ghobt. Do woa i so froh dass i dazu auf Facebook "Freude schöner Götterfunken" gepostet hob. Weil i oba ka version gfunden die ma imposant gnuag woa, hobi die Muppet-Version gepostet.
und ois besonderes schmankerl hobi dazua gschriebn: "Bitte aufn Text achten!" hahahahaha lololololol *rofl*
Aussadem bini dann nu bis hoib 4 herumglegn und hob ned schlofn kina.Hoffentlich is des heid ned wieda so. Najo, warme milch mit honig trinken und abwarten. Interessanterweise bini oba goa ned müde. Vielleicht soit i moi probieren ohne schlaf zu leben. Nur hobi ma nie wos zum doa. I kinnt ausprobieren: 1 nocht aufbeleiben dann a nocht schlafen, immer abwechselnd hoid.
Jez is Montag. heute hod da Opa Geburtstag.
ALLES GUTE ZUM GEBURTSTAG OPA!!!
eine leckerschmecker interaktive Esterhasi Torte (jo i was des schreibt ma ned so)
DINGENS:
- Zum titel, mir is fad grod und deswegen schau i ma in digital design pauli maulwurf videos an.
- i verlier deutsche wörter. auf englisch kenn is ned und auf deitsch was is nimma, des is a problem.
- i hob am samstag milchreis gmocht hamham
- i mog in van gogh seine bilder
- der grund warum oben drie drei umlaute stehn, is weil i in da schule schreib und i dann einfoch nur auffimuss und kopieren und einfügen. So einfoch is des. und des lass i jez einfoch so zur dekoration moi stehn.
- noch was von die Muppets. Das Tier rules too! MAMAAAAAA
- ajo und fois des ned allgemein verstanden worden is. Jeder MUSS bewerten, sonst wird er von die weinenden Engel heimgesucht und zerfleischt.
Danke für ihre aufmerksamkeit, oder auch nicht. :) buba
Danke !!!!
AntwortenLöschen